معلش مكنتش احب ابدأ اول موضوع في البلوج بالكآبة دي .. بس القصة دي حقيقية وحزينة و رومانسية

من اسبوع كدة لقيت بابا لابس شيك جدا وكان شكله سعيد جدا .. سألته رايح فين ؟؟ قاللي رايح فرح "حاتم" تيجي معايا ؟ طبعا قلت لأ لأن كان ورايا مذاكرة كتيرة جدا في كليتنا العظيمة..

ده كان يوم الجمعة .. خلص الجمعة ويوم السبت كمان كان قرب يخلص بس حصل اللي مكنش يخطر على بال حد .. حصلت حاجة خلت ليل يوم السبت ده طويييييييييييل ..3مسدات(missed) من بابا العريس و بعدهم 4 مسدات من اخت العريس .. بابا خلص صلاة واتصل : الو خير ؟ .... تعالى بسرعة حاتم و مراته ماتوا ..... ايه ؟؟ ازاي ؟؟

لما سمعت الخبر ده حسيت بحاجات كتيرة داخلة في بعضها, اكيد من جوايا كنت موقنة ان ده قضاء الله و قدره بس جت تساؤلات كتيرة على ذهني : هو في عريس و عروسة بيموتوا بعد اقل من 24 ساعة من

جوازهم ؟؟ حد ممكن يموت في عز الفرحة الجميلة اوي دي ؟؟ طب في حد ممكن يستحمل حزن فراق ابنه او بنته بعد ما كانو عريس و عروسة من كام ساعة ؟

قلبي كان بيوجعني بالمعنى الحرفي للكلمة ساعتها وخاصة بعد ان سمعت اخبار الجنازة (ملحوظة لم اذهب للجنازة ايضا بسبب المذاكرة العظيمة ) ما اشبه الليلة بالبارحة امبارح كانت عربيتهم الجميلة اللي متزينة بالورد(اللي اكيد اعدوا ساعات ينقوا في الوانه و شكله ) بتجري في طريقها الي عش الزوجية الجديد جواها احلام كتيير ووراها بتجري عربيات اصحابهم و قرايبهم بتزفهم بالنغمة الشهيرة بتاعت الفرح .. و النهاردة عربيتين اسعاف بيزفوهم برضه بنغمة شهيرة بس في طريقها المرادي لمثواهم الاخير .. القبر .. كان مشهد فظيع و كل عربية من عربيات الاسعاف بتاخد طريق غير التانية و بتبعدهم عن بعض.. كل واحد فيهم راجع لاهله عشان يدفنوه .. فراق .. للأبد

ادعولهم بالرحمة والمغفرة وان ربنا يجمعهم ببعض في الجنة .. ملحوظة الولد ده مكنش كبير اوي يعني في (اواخر العشرينات ) والبنت برضه وكانوا في كامل صحتهم ورونقهم وكانوا فرحانين جدا و الكل كان بيتمنالهم و متوقعلهم حياة سعيدة لانهم كانوا بيحبوا بعض جدا .......و مع ذلك ماتوا