كلاكيع

ده كان عنوان حلقة النهاردة من برنامج "خواطر" على قناة الرسالة ..

والبرنامج ده-للي ميعرفهوش يعني- بيتناول في كل حلقة مشكلة من مشاكل المجتمع الاسلامي بشئ من الانتقاد و السخرية معا مع تقديم حلول سريعة ان وجدت .. مش بتابعه بصراحة بس المرادي عنوان الحلقة شدني ..

يا ترى هيتكلم عن انه "كلكوعة" من الكلاكيع اللي مالية حياتنا ؟

طلعت كلكوعة قديمة و كلنا عارفينها " تعقيدات الزواج و الاسراف في المظاهر و تعجيز الشباب امام سيل الطلبات المنهمر" لكنها صادفت اني في اليوم اللي قبلها كنت لسة بتكلم مع واحدة صاحبتي من دولة عربية غير مصر عن نفس الموضوع ..

رغم ان المشكلة قديمة قدم الازل الا ان المذيع والمعد بتاع البرنامج قدمها بطريقة واقعية جدا .. الراجل خد معاه ورقة و قلم والة حاسبة و نزل يلف .. سأل عن متوسط اسعار الحاجات دي : الخاتم و الشبكة ، فرش البيت ، الفرح و الديكور و شهر العسل و جمع المبلغ طلع

195,000 ريال يعني نقول 200 الف ، المذيع ده مرتبه في الشهر 400ريال (هو اللي قال) ، قعد حسبها فلقى انه عشان يحوش 200الف ريال هتبقى سنة 2016(كل ده في البرنامج) ، فقرر انه ينزل يعزم الناس بما انه حدد معاد الفرح : يا ريت تشرفونا زي النهاردة سنة 2016

طبعا مش هعلق على ال 4000اللي بياخدهم و مش مكفيين(زمانه اتحسد من الكام مليون مصري اللي بيتفرجوا عليه) ، بس ممكن اعلق على مرتبات الشباب حديثي التخرج في مصر .. و للا بلاش .. لا تعليق

الذ حاجة بقى انه روى حادثة ان شاب جاء الى الرسول عليه افضل الصلاة و السلام و طلب منه انه يجوزه بنت ما ، فالرسول (ص) سأله هل عندك او معاك شئ ؟ عشان يقدمه لعروسته يعني فالشاب الفقير قال لا والله ن فالرسول (ص) امره ان يذهب الى اهله فيسألهم عن شئ فلم يجد عندهم اي شئ ، فسأله الرسول و لاخاتم حديد حتى ؟ فقالله: ولا خاتم حديد معنديش غير الهدوم اللي انا لابسها ، فسكت الرسول سكوتا طويلا و الشاب ينتظر ثم قال سيدنا محمد : هل تحفظ من القرآن شئ فقال الشاب نعم كذا و كذا فقال الرسوا : قد زوجتك بما حفظت من القرآن او كما قال صلى الله عيه و سلم.

سبحان الله بقارن ده باللي بيحصل دلوقتي .. طلبات عجيبة .. بتفكرني بطلبات السحرة و المشعوذين لما يجوا يعملوا عمل لو يحضروا عفريت في الافلام .. ريشة ملونة من ديك يتيم ..ظفر قطة سودة عندها شعرتين ابيضين .. ليه التعجيز ده .. الاسلام دين يسر.. وحدد معيار أساسي لقبول زوج للابنة هو الدين و الخلق .. ولو الاهل اختارو على الاساس ده فهم ضامنين ان العريس ده مش هيبخل على بنتهم بحاجة طالما ربنا مقدره ..

دي بعض الكلمات اللي سمعتها من اصحابي و زمايلي و قرايبي و الموضوع فكرني بيها

رأي صاحبتي في طلبات اهل العروسة في مصر : دا انتو معقدين ...

رأي ( فلانة) : مفيش حد يقدر يتجوز من غير مساعدة اهله ..

رأي ( فلان ) : ليه التلاجة ؟ ..في قلة ! و ليه البوتجاز ؟ .. في باجور !

Draft