الشيك ..و الرايق .. و الجرسون

دخلت الدكتورة (الطبيبة) ..الأمورة .. لابسة احلى حاجة عندها .. ولفة الطرحة احلى لفة .. و مظبطة ال make up احسن حاجة ( طبعا على الأقل اعدت تلت اربع ساعات الصبح قبل الامتحان تجهز نفسها علشان تنزل من بيتها بالشياكة دي ) .. واعدت في مكانها في لجنة الامتحانات و على وجهها علامات الاطمئنان الشديد ولا كأنها اعدة في سينما .. بينما الأخريات ( الأقلية ) يجلسن "متحنطين " في اماكنهن يرتعدن من القلق و كل واحدة فيهم بتقول الشهادتين كأنها "بتحتضر" مش في امتحان ..
بدأ الامتحان و كل واحدة من اللي كانوا بيقولوا الشهادتين مسكت القلم و نزلت حرت في الورقة .. و الأخت (الشيك ) رجعت ضهرها لورا و اعدت تقرا الورقة باسترخاء شديد كأنها بتقرا الجرنان الصبح على السرير ..
وبعد شوية (نص ساعة من الامتحان ) دخل الدكتور (الطبيب ) .. برضه نفس الأناقة و الروقان و اعد في مكانه جنب زميله ( واحد من اللي بيقولوا الشهادتين قبل الامتحان ) و نده على المراقب : "جرسون .. ورقة الأسئلة لو سمحت "
قرب الامتحان يخلص وانا لسة بحرت ( اه نسيت اقولكم ان انا من الناس اللي بتحتضر قبل الامتحان ) و فجأة بدأ السيناريو المعتاد .. خلصت الأمورة قراية الجرنان وقالت تحل الامتحان بقى .. ولفت وراها عشان تطلب المساعدة من اخواتها في الله .. كدة انا مضطرة اسحب كلمة (طبيبة ) اللي قلتها عليها في الأول لأنها تحولت فجأة الى شحاتة .. متسولة بكل المقاييس بجد .. و الشهامة و نبل الأخلاق تنزل على اصحابها بقى و كل اللي يقدر "يحدفلها " كلمة بيحدف .. كأن البنت بقى يا عيني ذاكرت و تعبت و مش عارفة تحل .. و الأخ ( الرايق) اللي دخل بعد الامتحان بنص ساعة بدأ تهييس .. يا ريته بيغش .. بينادي على "الجرسون " و يقوله : انا مش عارف حاجة .. فيتظاهر الجرسون بالاحترام و الأخلاق العالية و يقولله كنت ذاكرت يا دكتور .. فيرد ( الرايق) : والله مش فاكر ، فيقررالجرسون انه يظهر على حقيقته و يروح عند (طبيبة بجد بجد ) و يقوللها : راعي زمايلك يا دكتورة !!!!
فضلت الدكتورة ( الشيك ) و الدكتور (الرايق) يتسولوا ما بقى من وقت الامتحان .. و الصدقات تنهال عليهم من كل المحسنين .. و الكلام يطير حوالين ودني .. ساعات بكتشف ان عندي غلطات و يبدا (شوشو ) في ممارسة عمله باتقا ن لاقوم بتغيير اجابتي .. الحمد لله بنتصر عليه .. بس بعد صراع نفسي مرير بيستهلك مجهودي الذهني ووقت الامتحان .. كل اللي بقدر اعمله طبعا اني اقول اني مش عارفة اركز من الصوت .. لكن في اخر امتحان : انفجر الكبت الفظيع جوايا .. لقيت نفسي بصرخ بعلو صوتي : " عيب عليكم بجد " رن صوتي في اللجنة كلها ، واتجهت كل الانظار طبعا الى المريضة النفسية اللي اتجننت و مخها فلت من كتر المذاكرة .. اما الرايقين فمعملوش حاجة غير : "sorry "
على فكرة ال(الشيك ) و ( الرايق ) دول عينة بس لكن للأسف الشديد دول مثال على الأغلبية !!
نفسي اعرف مين ال (criminal ) اللي هيسمحلهم يبقوا دكاترة يتعاملوا مع مرضى غلابة .. يحافظوا على صحة الناس و سلامتهم و مالهم واسرارهم .. انا حاسسة اني سلبية علشان مبعملش حاجة توقفهم عند حدهم .. بس الكباراللي اتكلمت معاهم في الموضوع ده قالولي " متخسريش حد " .. مش عارفة بس حاسسة ان سكوت اي حد على الغش مشاركة فعالة في خروح " الأطباء النص كم " دو الى عالم الطب ( اللي المفروض انه نظيف و شريف ) ..انا محتارة فعلا
ااااه صحيح نسيت اقولكم ( الشيك ) عملت ايه بعد الامتحان : ( ايوة يا مامي الامتحان كان سهل موووووووت !!!!!!!!!!!!!!!!!!!!!!!!!!!!!!!!!!!!)