وقفة مصرية ..

ايه اليفط الحمرا دي كلها ؟؟؟؟؟؟؟؟ هو الأهلي كسب وللا ايه ؟؟
لافتات حمراء كبيرة على طول طريق صلاح سالم ( وفي شوارع كبيرة اخري ) تحمل شعار :
"وقفة مصرية " و كل واحدة مكتوب عليها : نحكم عقلنا .. ناكل كلنا ( وصورة رغيف عيش جميل جدا ولا في الأحلام اصلا )، نحكم عقلنا .. نتعالج كلنا ، نحكم عقلنا .. .... الخ .
اعدت افكر يا ترى اليفط دي بتاعت ايه ؟؟؟ ( ممكن تقولوا عليا جاهلة او لا اتابع الأحداث الجارية )
بس كل اللي فهمته انها حملة كبيرة بل فظيعة بل هائلة بل مريعة بل ... مش عارفة .
طريق صلاح ساااااااااااالم الطويل العريض ده كله مفيهوش ولا اعلان غير "وقفة مصرية ؟" بكام ده كله ؟؟.. عرفت بعدين انها حملة للدعاية لتنظيم الأسرة .. اعدت اضحك اوي .. اذا كان طالبة في كلية طب ( المفروض يعني انها بتفهم ) و مفهمتش ان دي حملة لتنظيم الأسرة ..
و بعدين حتى اذا الناس فهمت .. ممكن مثلا اعلان واحد قراه وهو "مزنوق "في ميكروباص والناس "متكومة " فوقه يأثر فيه و يقنعه ؟؟؟ ..
يعني مثلا لو واحد عايز يجيب عيال كتيرو قرا الإعلان يغير رأيه و تاخده الوطنية و يقول لمراته " لا بلاش نجيب عيال .. يللا نحكم عقلنا .. علشان ننقرض كلنا " ؟ معتقدش
اكيد انا مش ضد تنظيم الأسرة .. ولا ضد الحملات دي .. بس تنظيم الأسرة محتاج " حملات توعية " مش "حملات دعاية " .. دي حملات دعاية .. مكلفة جدا .. ده لو كانوا وفروا فلوسها كانوا جابوا اكل ودوا للعيال اللي هتتولد في التلت اربع سنين اللي جاييين ..
و اقصد ب "حملات توعية " انها تكون "موجهة " للطبقة اللي هي السبب في الزيادة السكانية ( اللي هي في الغالب مبتعديش في صلاح سالم .. ولو عدت بتبقى مزنوقة في ميكروباص و مش شايفة الإعلان اصلا .. ولو شافته هتدعي علىالاعلان واللي عمله واللي علقه ...)
بجد احب اعبر للمبدعين اللي عملوا الحملة دي عن اعجابي الشديد بشكل اللافتات .. ولونها .. و جمال الصور .. بس مضطرة اقول انها للأسف ملهاش لازمة ..
و ياريت الحملة تحكم عقلها .. و تشيل اليفط كلها