قصر البارون

مش عارفة .. طريق صلاح سالم ده اصبح مصدر الالهام الوحيد بالنسبالي من كتر ما بعدي فيه كل يوم رايحة جاية .. اخر مرة اتكلمت عن حملة وقفة مصرية .. و المرادي هتكلم عن "قصر البارون " ..

زمااان لما كنت صغيرة كنت بخلي بابا يبطأ اوي سرعة العربية لما نقرب منه عشان اتفرج عليه شوية .. و فاكرة اني مرة سألته " بابا هو مينفعش اشتري قصر البارون ده لما اكبر ؟" .. كنت و ما زلت بحب اتفرج على القصر ده بالذات اوي لأنه على ما اعتقد الوحيد من نوعه في مصر .. كل القصور التانية مبنية في الغالب على طراز عربي او اسلامي .. اما ده واخد شكل "أسطوري " شوية يمكن طراز هندي سمعت كدة.

ساعات بتخيل نفسي في القصر ده .. مرة و انا ببص من احدى شرفات القصر على الصحراء الواسعة (زمان صلاح سالم ده كان صحرا).. و مرة و انا نازلة على السلالم العجيبة بتاعته .. و مرة و انا لابسة

فستان ابيض و اعدة في الجنينة و حوالينا الصحرا ( ولا حلم من الاحلام دي بتخيل فيه

العربيات رايحة جاية في الشارع ) دايما بتخيله و هو في الصحرا .

في فترة كنت بحب قصص الأشباح اوي وده زود حبي للقصر لأنه كان مكاني المفضل لتصوير افلامي (قصدي أحلامي ) .. و النهاردة بس عرفت عن القصر ده حاجات عجيييييبة معرفش اذا كانت صح وللا غلط .. اولا عرفت ان في سرداب طويييييييل طوله اكتر من 5 كم بيوصل ما بين البدروم بتاع القصر و كنيسة البازيليك في شارع الأهرام في روكسي ( تخيلوا المسافة ) ... و عرفت كمان ان الجزء العلوي من برج القصر كان بيدور دورة كاملة كل ساعة و لكن تروسه تعطلت منذ زمن بعييييييييييد ..

المهم دلوقتي اني نفسي ادخل القصر ده و اتفرج عليه من جوة .. مش عارفة ده ممكن وللا لأ .. انا سمعت ان وزارة الثقافة ناوية تعمله متحف او مزار سياحي .. و ساعات كتير وانا معدية ادامه بلاقي ترابيزات و كراسي في حديقة القصر .. معنى كدة ان الناس بدأت تقترب من هذه ال mystery الرهيبة .. القصر الغامض .. العجيب انه فضل فترة طويلة جدا جدا محدش يعرف عنه حاجة رغم انه موجود في مكان مليان ناس يعني من ساعة ما صاحب القصر "البارون امبان " مات سنة 1927 تقريبا لحد دلوقتي و هو مقفول .. حتى بعد الغرائب و العجائب اللي يقال انها بتحصل في القصر ( اصوات ، حريق و دخان انطفأ لوحده ، اشباح .. الخ ) كل ده و محدش فكر يستكشفه .. يا ترى هتيجي الفرصه اني احقق احلامي بالقصر ده .. مش لازم اشتريه يعني :) كفاية بس ادخل اتفرج عليه .