نأسف على العنوان ...
اكيد مش واضح .. بس كلمة "أهلي " اللي في العنوان معناها" النادي الأهلي " ....
شعور سئ جدا انك لا تفقه اي شئ عن كرة القدم في بلد بتنام و تصحى و تاكل بكرة القدم .. الأطفال المصريين بيتولدوا بيعرفوا يلعبوا كورة ..ايوة أنا متأكدة لأني مرة شفت ولد يدوبك 3 سنين بيلعب كورة في الشارع ... اتعلمها امتى ؟؟
انا لسة فاكرة ولاد فصلي ايام المدرسة لما كانو بينتهزوا اي فرصه عشان يلعبوا كورة .. كانو بيخرجوا من الملعب لونهم أحمر (لون تراب الملعب ) .. ايه الكورة دي يعني عشان الشعب كله يبقى مدمن كورة ..
رغم تحليلي النفسي للموضوع اللي هو ان المصريين بيشوفوا في الكورة المصدر الوحيد لرفع معنوياتهم المنخفضة .. واننا بما اننا مش قادرين ننتصر على اسرائيل و امريكا فبننتصر على الزمالك في الدوري (اسمه كدة ؟؟) أو على الدول الافريقية الأخرى في كاس الامم .. الا اني ما زلت اتعجب من ذلك الحب الشديد للكورة ..
وقفت ادام ال stand بتاع ال best seller ادور على اي كتاب اشتريه بدل الفراغ الفظيع بتاع الاجازة ده (قبل رمضان طبعا ) ده طبعا بعد ما كل الكتب اللي عندي خلصت (اصحابي استلفوهم قبل ما اقرا صفحة واحدة منهم كالعادة ) .. لقيت كتاب صغير كدة اسمه ( يا اهلي يا حبي يا حتة من قلبي) .. توقعت ان الاسم ده يكون اسم احدى المقالات داخل الكتاب و ان بقيت الكتاب يكون فيه مقالات متنوعة عن حاجات تانية اكثر اهمية .. و فعلا اشتريت الكتاب و قبل ما انام ابتديت اقراه .. المقالة الاولى عن الكورة .. مش فاهمة ولا كلمة و لاكأني بقرأ عربي ..مش مهم قلبت الصفحات لحد ما وصلت للمقالة التانية .. برضه كورة ؟؟؟؟؟؟؟؟؟ لا .. حرام .. وابتدت الحقيقة المريرة تضح امامي ... الكتاب كله عن الكورة ..
اتغظت من الكاتب جدا .. ايه الروقان ده .. رحت اشتكي من الكتاب لماما .. "على فكرة ياماما الراجل ده عامل الكتاب كله عشان متغاظ من واحد كدة اسمه "محمود الجوهري" اول مرة اسمع عنه .. بدأت نظرات ماما تتشكل لتكون نظرة احتقار كبيرة .. متعرفيش مين هو محمود الجوهري ؟؟ انتي مش من البلد دي .. ده رئيس اتحاد الكورة باين ( والله ما فاكرة قالتلي ده يبقى مين ) .. دي مش مشكلة الكاتب يا حبيبتي دي مشكلتك انتي .. ايه الجهل ده ؟ ...
طيب السؤال دلوقتي : هو انا المفروض احب حاجة واهتم بيها لمجرد ان كل الناس اللي حواليا كدة ؟؟
الاجابة : لأ مش المفروض ... و أ،ا بقولها اهه أنا مش بحب الكووووورة
اه صحيح نسيت اقوللكم مصير الكتاب بعد ما عرفت انه كله عن الكورة .. رميته فوق الدولاب مع القصص بتاعتي و انا صغيرة ..
Falling hearts Here
هناك 6 تعليقات:
matsh el ahly we el zamalek (( match kema ))
haykon yom el 7ad isa .... 3ayzik ba2a ta5dy balik mn kol 3anawen el garayed .... we ensy ba2a ay moshkila kanet fel balad .... kolo beyetnesy ya do. ana gayez aro7 isa .... ageblik tazkaratatayen
ohhhhhhhh ahlawyyyyyyyyy
ana msh fahma ya 3mr enta betetrya2 walla betetkalem gad...bs tab3an ana 3arfa en el 3naween hatet3'ayar mn "el dwee2a" lel match.. msh ba20lak el kora de el "General anaesthesia" bta3et el masryeen..lma yetweg3o mn ay 7aga yetfarago 3la match ye7'efo 3la tool
fe mawdo3 ta3`yeer el 3anaween ba3d el match
ana mish baharag ya yassoo ... bokra tshofy :)
انتى عارفة يا ياسمين كان نفسى اكون بفهم فى الكورة ولو شوية صغننين صدقينى حاولت زمان وانا فى اعدادى كدة بس كنت بقعد اصرخو و اشجع واكتشف ان الكورة فى نص الملعب لسة وطبعا بابا المتضرر الوحيد فى الوقت دة وذنبة الوحيد انه بابايا
فانا فضلت اكتفى بهذا القدر وافضل بودنين طوال قدام الساحرة المستديرة
فلو عندك فرصة تفهمى افهمى العلم نور بردو
افهم ايه يا بنتي ؟؟
الموضوع ملهوش علاقة بالفهم ليه علاقة بالادمان ... الناس مدمنة كورة
اللي بيحب حاجة بيفهمها و يتعامل معاها بسرعة .. لكن اللي مش بيحب الحاجة بيبذل مجهود فظيع عشان يفهمها ..زي مثلا الكمبيوتر ؟؟ مش احنا مدمنين كمبيوتر (او على الاقل كنا ) عشان كدة بنعرف فيه حاجات كتير من غير محاولات تذكر للفهم .. برضه مدمنين الكورة كدة ، هم محاولوش يفهموها هم لقوا نفسهم فاهمينها .. ازاي معرفش
ميرسي يا هيمي على مشاركتك نورتي البلوج
بصى يانانا انا هقولك حاجه يمكن اول مره تعرفيها ان جدتك كريمه كانت بتحب الكوره قوى وخاصه لما بيكون الاهلى بيلعب مع بلد اخر كانت بتشجع وهى مش فاهمه حاجه فى الكوره ولكن الانتماء هذا الانتماء الذى فقد الان حقيقى احنا فقدنا انتمائنا لكثير من الاشياء
وعلشان ذى ماقلتى اننامش لاقيين حاجه تجمعنا ومبقاش حاجات كتير تفرح انتم جيل مظلوم ادعوا الله بان يفرح قلبكم فان دعوه المظلوم لاترد
إرسال تعليق