أخيرا .. عرفت أسمه ايه ..بجد مكنتش عارفة اللي بيحصل ده اسمه ايه ؟

ازاي تبقى بتشوف حد كل يوم و تحس انك مفتقده .. بعد ما كنت بتحس انه على طول معاك حتى لو فات شهر مشفتهوش

تحس انه بعيد عنك بألاف الأميال و هو واقف جنبك ...

مهما اتكلم تحس انه ساكت عشان كلامه دخل ودنك بس موصلش لقلبك .. بعد ما كنت بتحس بكل كلامه و هو ساكت

هو ده " الفراق الروحي" .. قريت الكلمة دي في مدونة "أحبائي" و انا شخصيا بحب المدونة دي اوي .. مش بس عشان صاحبتها شخصية عزيزة عليا اوي .. لكن عشان هي خلاصة رحلة طويلة في الحياة و تجارب كتير ..

نرجع لموضوعنا .. الحقيقة المصطلح نفسه عجبني اوي لأني بحب اي مصطلح يوصف المشاعر بدقة .. رغم ما توحي بيه كلمة "فراق" في حد ذاتها من ألم وعذاب و خسارة .. الا انها تصبح هينة اذا قارناها بنفس الكلمة بعد اضافة كلمة "روحي" اليها ..

لما حد بتحبه يسافر أو يبعد بأي شكل ، مخك بشكل او بآخر بيترجم ده على انه "فلان مش هنا " هتزعل لكن هتتأقلم .. ده الفراق

لكن لما يكون الشخص ده هنا بس انا مش شايفه ومش حاسسه .. فدي مخيفة شوية .. ده الفراق الروحي

طيب ليه ؟؟ .. عادي زي الفراق العادي .. الفراق العادي ممكن يكون بمزاجنا زي السفر و قرارات الانفصال و ممكن يكون غصب عننا زي الموت .. كذلك برضه الفراق الروحي ممكن يكون بمزاجنا .. احنا اللي ناخد القرار الأحمق بأننا نقطع كل الروابط بعمايلنا "السودة"

.. أو انه يحصل فراق روحي فجأة بدون اي اسباب او مقدمات او تسلسل منطقي للأحداث .. و ملحوظة مهمة ده حاجة و الكراهية و الحقد و الكلام ده حاجة تاني خالص .. الكراهية و الحقد مشاعر .. اما الفراق الروحي حالة بلا اي مشاعر ..

طالما اعتقدت ان الفراق -بنوعه الأسوأ اللي هو الموت في رأي- هو أقسى حاجة ممكن يتعرض ليها الانسان .. عشان كدة كانت احدى دعواتي "اللهم هون على الفراق " اللي شفته واللي هشوفه " و بكل أنواعه ...

يتبع ..(أو لا يتبع )