افتقدك ايتها الطبيعة

يا بخت الانسان البدائي ..

بحسده بجد .. كل حاجة في حياته كانت اكيد جميلة .. اكتر حاجة بحسده عليها انه كان بيمشي حافي في الشارع ..

انا زهقت من كل حاجة حوالينا .. المواصلات بعوادمها و ازعاجها .. الكمبيوتر ب(مسنجره ) ب (فيس بوكه) .. الكلية بكتبها و مذاكرتها .. التليفزيون برخامته و رزالته و كدبه .. الموبايل بمسداته و مسجاته .. الهدوم بألوانها وموديلاتها .. المولات و الكافيهات بمنيوهاتها و ديكوراتها و اضاءتها .. زهقت

عايزة ارجع لأمي ..الطبيعة كما خلقها الله سبحانه و تعالى .. وانام في حضنها .. و اشكيلها من حياتنا اليومية المزعجة

نفسي في حاجات كتير متحققش منها غير حاجة واحدة .. ده كان في شتاء السنة اللي فاتت .. حققت حلم من احلامي بالطبيعة .. وقفت على شاطئ مش واقف عليه حد غيري .. انا و الرمل و البحر و الشمس و بس .. كان في بيوت و شاليهات على بعد امتار قليلة و لكني تجاهلتهم ..عشان مفتكرش اللي عمله الانسان الشرير في الطبيعة الجميلة النقية ..

في جزء من الطبيعة الجميلة جوا كل حد .. بس مبيعرفش يطلعه لأن الناس هتقول عليه مجنون .. و هو ده السبب ان باقي احلامي بالطبيعة مش هتتحقق .. مش هجيب شجاعة كافية اني اعيش الطبيعة اللي جوايا .. هو ده السبب في اني بحسد الانسان البدائي انه كان بيمشي حافي في الشارع .. و كان بياكل الخروف او الغزالة المشوية من غير ما يمسح بقه بالمنديل بعد كل قطمة .. و من غير ما يقوم يغسل الاطباق بعد الاكل ..

نفسي اصحى الصبح على صوت الديك .. و اخرج من الكوخ بتاعي ..اغسل وشي من مية البحيرة اللي ادام الكوخ .. واتمشي في الحدائق و الغابات اللي جنبي اجمع الخضروات و الفواكه و بيض الطيورفي سلة صغيرة من القش و اروح اعمل الفطار على النار اللي ادام الكوخ ..و بعدين اقضي بقيت اليوم

على المرجيحة اللي مربوطة بين شجرتين ..لحد ما معاد الغدا يجي ..اروح اصطاد ارنب ..ولا بلاش ارنب (هيصعب عليا ) .. اي حاجة و اكلها و انام في الهواء الطلق لحد بليل ما يجي اتفرج شوية على النجوم في السما و بعدين ادخل الكوخ ..

لما احب اصرخ بعلو صوتي اصرخ و لما احب اجري في اي حتة من غير سبب اجري .. عارفة ان في ناس هتقوللي و فين الهدف ؟؟ حياتك مش هيبقى ليها معني .. بس انا مش عايزة هدف.. و لا معني .. ولا تفكير ..ولا دوشة .. زهقت ..و تعبت