مدونتي العزيزة ....وحشتيني

من زمان مكتبتش حاجة فيكي .... معلش كنت أعاني من حالة توهان فظيعة
كنت عايزة احكيلك على حاجات كتير بس قلت بلاش عشان احنا مش لوحدنا وفي ناس كتير بتدخل تقرا اللي بكتبه فيكي ، فآثرت الكتمان ، و ها أنا اعود اليكي من جديد .... انا بقيت في سنة خامسة على فكرة ...احسن تكوني مش واخدة بالك ..أصل اخر مرة كتبت فيكي كنت لسة في سنة رابعة
عارفة يعني ايه سنة خامسة ؟؟؟ يعني نص البكالوريوس ....اصل البكالوريوس بتاعنا اسمه " بكالوريوس الطب والجراحة" .... السنة دي الطب والسنة الجاية ان كان عمري ما زال فيه بقية هتبقى الجراحة ان شاء الله .... بس انا عندي مشكلة ...على عكس توقعي انا مش مبسوطة ... ومش متحمسة ... وصلت لحالة ملل غريبة من الدراسة .... عايزة اشتغل بقى ... عايزة تجديد في حياتي .... ساعات بحس اني اخترت اصعب و أطول الطرق و بحس ساعتها بالغباء و ساعات تانية بندم على الإحساس الأول و اقول الحمد لله انه وفقني لما انا فيه .....بس انا محتاجة قفزة عالية عشان احقق اللي بتمناه ... والطاقة المعنوية جوايا مش كافية اطلاقا عشان اعمل القفزة دي .... محتاجة مصدر طاقة ... بجد انا دلوقتي اعيش المعنى الحرفي للإحباط ...وهو ذلك الفرق الشاسع بين ما يتمناه الانسان وما يمكنه تحقيقه .... ولي عودة